28 August 2006 Mon

阿蕭上周四抵達多倫多之後，忙於見朋友。以下係大人既自白。

我們在24日平安抵多倫多，蒙友好到機場接機，並有多名友好稍後到訪蕭宅。兒子亦在次日由滿地可抵多倫多團聚。好開心。

今日到北約克醫院門診抽血，聽日會打電話回溫哥華給醫生，問結果及是否需要調整用葯份量。目前一切還算好。連日來友好相約飲茶食晏，不亦樂乎。蕭記護士長則忙於清潔家居，要享受一個安樂窩。

附上照片數張及圖片說明。

請代向溫哥華各人問好

蕭

23 August 2006 Wed

　

阿蕭聽日就飛返多倫多啦!!記者有幸係佢老哥臨走前食晚飯，蕭大嫂大談返多倫多既遊山玩水大計，又話大人係溫哥華呢近半年先至去玩，以前都係工作至上。大人又提到第時返溫哥華有mud好撈，佢想幫小朋友映相。仲話第時自己既作品人家爭住要。咁多倫多既朋友，快D叫大人幫你映張相。祝大人同大嫂旅途愉快!!Say hi to Toronto!!

22 August 2006 (Tues)

　

阿蕭今日睇完醫生之後，大人終於羅到主診醫生既permit，俾大人坐飛機返多倫多，蕭氏夫婦隨即決定係今個星期四，即24號就返多啦!!有得返多倫多係天下一大樂事，恭喜!恭喜!真係恨死隔離!!不過醫生同時要大人加多少少抗排斥藥，返到多倫多之後，主診醫生仲要玩遙控，護士長舉例，若大人係星期一驗血，星期二就長途電話俾主診醫生，問佢洗唔洗加或減藥，每個星期仲要向主診醫生「報到」一次。

17 August 2006 Wed

　

阿蕭今日有少少身痕，問佢有冇食類固醇既其他副作用，如腳腫等，大少隨即話：「冇!我choy過你!」不過類固醇既另一個「副作用」就已經出現左，令阿蕭胃口好大，但類固醇又同時令大人鬼打咁精神，於是就冇過往咁好訓。

　

15 August 2006 Tues

　

蕭記護士長引述醫生話，阿蕭出現少許排斥現象，所以尋日身痕，同埋個肝有少少問題，好在醫生英明神武叫大人即時食類固醇，不過份量都有番咁上下，依家食50mg，玉姐話最勁個陣既服食份量係100mg。大人今日個身冇再痕，但就要定時督手指驗血，因為護士長話，大人過往食呢個份量既類固醇，曾出現血糖過高，同腳腫既副作用，但呢D副作用依家都仲未出現，只係個口有少少腫，大家唔洗咁擔心。

　

醫生話，大人食番類固醇之後，身上紅班過兩三日就會退，下星期一要再去醫院抽血，星期二睇肝指數，同見醫生，因為醫生話，要食幾日類固醇先至知係咪可以控制住排斥，如果唔得先至再加藥，或者留耐D，睇定D，因此大人原定今個星期返多倫多既計劃要押後。

　

14 August 2006 Mon

　

醫生話阿蕭個肝要再觀察，今日要加抗排斥藥同食番自2月以來都冇食過既類固醇，而且聽日仲要見醫生，評估一下大少既情況。阿蕭唔知mud事幹，夜晚同記者食飯個陣係咁，「好痕呀，好痕呀!」係咁au背脊，記者問佢點解突然咁痕，佢老哥開頭話：「見到你咪痕。」跟住又話mud野七年之癢，但點知屈指一算，大人點止同大嫂結婚七年咁少，於是就係咁20幾、20幾極都up唔出自己究竟結左婚幾多年。記者火速催促大人快D恢復記憶，否則今日肯定要罰坐「痰冠」，不過大人冇有怕，因為屋企冇「痰冠」。結果玉姐淡然咁講左句25年，就幫老公解圍。大人又自我解圍咁話七乘三未到28，因此未夠三次七年之癢。